سليمان ڪورائي فقير: ڪافيءَ جو مشهور شاعر سليمان ولد محراب خان ڪورائي، ڳوٺ ٻڍو خان (شاهو خان ڪورائي)، تعلقي ساماري جو رهاڪو هو. اصل صوفي فقير جي ڀر جو هو. سندس جنم 1246هه/ 1830ع ۾ ٿيو. محمد عالم ڏيري ڀٽ واري، جيوڻ نُون، منٺار فقير راڄڙ، پير فضل علي شاهه ساگري واري ۽ محمد فقير کٽياڻ سان سندس ڪچهريون ٿينديون هيون. فضل علي شاهه وٽ شعر چوڻ شروع ڪيائين. ان وقت سندس عمر پنجاهه ورهيه هئي. 1364هه/ 1945ع ڌاري وفات ڪيائين. سندس ڪلام جو نمونو هيٺ ڏجي ٿو:
وڻ ولايت واٽون واسي، سامي سرها آيا،
سامي سرها آيا، ساڪن سر صورت سمجهايا،
طرف طمع جا ترڪ ڪري، پرت کڻي ٿيا پاسي،
گُرمک گوهر گنگا گڏيا، پيچ پورب جا پايا.